SWEM
Diamantveld het weer vanjaar die immer gewilde swemgala aangebied. Dit bied nie net aan die swemmers van formaat 'n geleentheid om hul vermoëns ten toon te stel nie, maar is ook 'n prettige geleentheid waaraan selfs die skoolhoof ''gewillig'' deelneem. Die matrieks se ''kostuum-seremonie'' verleen jaarliks besondere kleur aan hierdie geleentheid.
Alhoewel Diamantveld moontlik nie allerweë as 'n ''swemskool'' bekend staan nie, lewer ons reeds dekades lank individuele uitblinkers op wat bevestig dat elke gebalanseerde leerder in 'n veilige, stimulerende omgewing sy beste potensiaal kan bereik.
Karen Muïr was Diamantveld se eerste Springbok swemmer en is steeds 'n toonbeeld van ons potensiaal in die swembad. Meer onlangs het Milize Symington die provinisie nasionaal verteenwoordig.
SOKKER
AGTERGROND EN OEFENINGE
Wêreldwyd is sokker die sportsoort wat deur die meeste mense gespeel en gekyk word. Volgens FIFA speel sowat 265 000 000 mans en dames sokker en ongeveer 50 van hulle is Diamantvelders.
’n Steeds groeiende belangstelling in sokker het daartoe gelei dat dit in 2006 ’n amptelike sport by die skool geword het. Die Wêreldbekertoernooi van 2010 het van nuuts af die belangstelling aangewakker en daar is toe ook ’n meisiespan op die been gebring. Sowat 25 seuns en 20 meisies neem tans aan sokker deel.
Sokker verg baie vernuf en veral balvaardighede! Die ideale sokkerspeler is vinnig en rats. Tydens oefeninge word baie tyd aan balbeheer en –hantering spandeer en taktiese spel word verfyn tot die kuns wat dit is. Die sokkerspelers kry baie geleentheid om te speel, want dit is veral tydens spel wat hulle ontwikkel en geleentheid kry om hul vaardighede te slyp. Daar word dikwels vriendskaplike wedstryde gereël aangesien spelers meer gemotiveerd is om hul beste tydens wedstryde te gee.
AFRIGTERS, KOMPETISIES EN UITBLINKERS
Mnr. Peter en mev. Susanne Baumgartner is die huidige afrigters van die seuns- en dogterspanne. Hulle is van Duitsland en mev. Baumgartner is vir 2 jaar (2010 en 2011) aan Diamantveld verbonde. (Sien meer oor haar rol in die “Partnerschule” vennootskap by “Ons is trots’’.) In Duitsland speel feitlik almal sokker en die Baumgartners is bly oor die geleentheid om hulle liefde vir die spel en hul kennis met Diamantvelders te deel.
Die seunspanne speel in verskeie ligas en kompetisies in Kimberley en het ook in Desember 2010 aan ’n toernooi in Kaapstad deelgeneem. Die span het 4 wedstryde gespeel en onder andere die toernooiwenners 7-6 geklop. Van die 4 wedstryde het Diamantveld 2 gewen, 1 gelykop gespeel en 1 verloor. Vir ’n jong, onervare span is dit puik resultate.
Die seuns se kompetisies sluit die Coca Cola-, Motsepe- en Metropolitan beker-kompetisies in. Wenners van die Motsepe-beker stap weg met prysgeld van R500 000, dus is daar baie op die spel.
Die meisies neem in ’n ope liga deel en hulle speel wedstryde teen ander skole in Kimberley en Platfontein.
FASILITEITE EN BORGE
Die sokkerspanne oefen 3 dae per week by O’Grady’s. Volgens die afrigters, mnr. Peter en mev. Susanne Baumgartner, is die Suid-Afrikaanse kinders bevoorreg om op grasvelde te oefen en speel. In Europa word daar meestal op sintetiese velde gespeel en grasvelde is slegs die beste spanne beskore. Wat Kimberley betref, is Diamantveld se fasiliteite van die beste.
REMAX DIAMOND FIELD PROPERTIES is die sokkerspanne se nuwe borg.