Die Aitsa het in 1975 ontstaan. Die Afrikaanse Taalmonument is op 14 Augstus 1975 in die Paarl ingewy en as deel van DHS se eie ''taalfeespublikasie'', het die matriekklas en hul ywerige Afrikaanse onderwyseres, mej. Marie Jordaan, 'n skoolkoerant aangepak. Dit was aanvanklik 'n klasprojek, maar die saadjie het in vrugbare grond geval en 34 jaar later (in 2009) word die Aitsa vir die eerste keer as die beste skoolkoerant in die land aangewys. In 2010 verwerf die Aitsa vir die tweede opeenvolgende jaar hierdie gesogte toekenning van Media 24.

Die kernredaksie se termyn strek van Junie tot Junie.

Die redaksie vir die 2011 - 2012 termyn bestaan uit:

Adriaan Smit ( Redakteur),
Megan Verreynne (Sub-redakteur),

De Wet Bezuidenhout en Phelecia Jacobs (Sport),
Jonel Ferreira (Uitleg),
Johan Haarhoff (Fotografie),
Doanné van Deventer (Kultuur en Vermaak) en
Anton O'Reilly (Finansies en Bemarking)

Die res van die groep bestaan uit spotprentkunstenaars, artikelskrywers, 'n bemarkingspan en nog 'n paar fotograwe.

Leerlinge bied hulself vrywillig aan (en gaan dan deur 'n keuringsproses), of word deur die redakteur en ander lede gewerf. Die kernreaksie word een keer 'n jaar deur die uitgaande kernredaksie verkies.

Mev. Retha Vos is die onderwyser verantwoordelik vir die skoolkoerant.

Verdienstelike artikels, foto's, grafika, spotprente, sowel as die koerant in sy geheel, word jaarliks vir Media 24 se skoolkoerantkompetisie ingeskryf. Die afgelope twee jaar (2009 en 2010) het die Aitsa uitstekend gevaar.

Te midde van strawwe mededinging, wen die Aitsa die nasionale kompetisie in 2009 en 2010.

Afgesien van die toekennings aan die koerant, het van die redaksielede in individuele kategorieë presteer en ook groot pryse losgeslaan. In 2009 was die pryswenners:

• Louis Fourie het ‘n eerste plek gekry in die afdeling Beste Redaksionele Kommentaar.
• Marieta Mostert het in die kategorie vir Beste Spotprent ‘n eerste en ‘n sesde plek behaal.
• Louis de Kock was eerste, tweede en derde in die kategorie Grafika. Die derde plek het hy met sy tweelingsuster, Madelein, gedeel.
• Elizca Jacobs het ‘n vyfde plek gekry in dieselfde kategorie.
• Louis de Kock het ook ‘n derde plek in die kategorie vir Beste Sportberig en ‘n vyfde plek vir Beste Nuusberig behaal.
• Elizca Jacobs het ook die derde plek vir die Beste Nuusfoto behaal.
  

Louis de Kock was die redakteur vir die 2008-2009 termyn.

 

In 2010 het die volgende individue toekennings gekry:

• Hestie van der Schyff ('n derde plek vir Beste Sportberig)
• Anri Ferreira ('n tweede plek vir Beste Grafika)
• Elsje Kuit ('n derde plek vir Beste Spotprent)

Anri Ferreira was die redakteur vir die 2009-2010 termyn.

Die redaksie woon ten minste een keer per jaar 'n koerantkursus van Media 24 by. Die opleidingsgeleentheid is verpligtend vir kernredaksielede en ander nuwe lede. Tydens hierdie kursusse word alle aspekte van koerant-maak gedek.

Die onderwyseres in beheer probeer deurgaans die leerders t.o.v. die skryf van berigte, artikels en resensies, die neem van foto's, taalversorging, uitleg, koerant-etiket, die stiptelike nakoming van spertye, ens. lei.