Die Aitsa is in 2009 deur Media 24 aangewys as die beste skoolkoerant in die land.
Drie kategoriewenners kom ook van DHS. Hulle is:
Verskeie ander toekennings is ook ontvang. Volledige besonderhede is by "Kultuur" te sien.
Anneke van der Schyff, VRL-voorsitter en wenner van die Diamant-toekenning vir veelsydigheid in 2007, is in Mei 2010 as die Dux-student van die Universiteit van die Vrystaat aangewys.
Anneke het in 2007 met 7 onderskeidings en ‘n gemiddeld van 102,8% aan Diamantveld gematrikuleer. Die prestasie het haar onder die Top 10-kandidate in die Noord-Kaap geplaas. Sy het in 2007 provinsiale kleure in netbal en tennis en ‘n brons sertifikaat vir ATKV-toneel verwerf. Sy het ook UNISA se Graad 7 klaviereksamen met welslae afgelê. Sy was ook in daardie jaar ‘n finalis in die Volksblad se Matrikulant van die Jaar-kompetisie.
Sy het haar studies (B.Com Finansiële Bestuur) in 2008 begin en het die tweede posisie in die fakulteit Ekonomiese en Bestuurswetenskappe (eerstejaars) beklee. In haar koshuis, Soetdoring, was sy die beste eerstejaarstudent en onder die algehele Top 5-Akademiese Presteerders.
In 2008 was sy in die Kovsie Top 20-netbalgroep en sy was kaptein van die Vrystaat O/19A-netbalspan. Op kultuurgebied het sy aan die Eerstejaars-sêr deelgeneem en sy was ‘n Kovsie-joolfinalis in 2008-2009. Sy het ook in verskeie komitees gedien.
In 2009 het sy die toekenning as beste tweedejaarstudent in Ekonomie, Finansiële
Ekonomie en Ondernemingsbestuur verwerf. Sy was weer onder die Top 5-Akademiese Presteerders in Soetdoring en is aangewys as die koshuis se Dux-student. Sy verwerf ook lidmaatskap van die Golden Key Honour Society. Sy dien in die Uitvoerende Komitee van die Studenteraad (Studente-ontwikkeling 2008-2009) en ook in verskeie ander komitees. Sy tree as projekleier vir Kovsie-gemeenskapsdiens op en sy woon die Po10see Leierskapkamp by. Sy neem aan Kleinsêr en die Mangweni-uitreik deel. Sy is weer in die Kovsie Top 20-netbalgroep.
In 2010 is sy weer lid van die Uitvoerende Komitee van die Studenteraad (Vise President Ekstern 2009-2010) en sy tree as ‘n NATP (New Academic Tutorial Programme) tutor in die Fakulteit Ekonomiese en Bestuurswetenskappe op. Sy is ook ‘n selleier in die Kovsiekerk en neem weer deel aan Kleinsêr. Sy speel ook in Soetdoring se Eerste Netbalspan en dien in twee koshuiskomitees.
Vir haar volgehoue prestasies en deelname op vele terreine, wys die Universiteit van die Vrystaat Anneke as sy Dux-student aan.
Sandra le Grange, ‘n 16-jarige Graad 11 Diamantveld-leerder, het verskeie provinsiale en nasionale spogprestasies op haar kerfstok. In 2010 wen sy al 3 titels in die 0/19 Noord-Kaap Pluimbalkampioenskappe. Sy wen ook 2 goue medaljes (dogters enkel- en dubbelspel) by die 0/19 SA-pluimbalkampioenskappe in Bloemfontein. In April 2010 neem sy as eerste gekeurde dogter in die O/19 Protea-pluimbalspan aan die Junior Wêreld-toernooi in Mexiko deel.
As 15-jarige was sy reeds in die O/19 SA-pluimbalspan ingesluit en sy het die skool ook in die Noord-Kaap O/17- en O/19 pluimbalspanne en O/16 muurbalspan verteenwoordig. Sy was ook gekies vir die SA Plattelandse muurbalspan, maar sy moes onttrek as gevolg van pluimbalverpligtinge. As tweede gekeurde O/19 SA-speler het sy die land in Augustus 2009 in Addis Ababa in die Afrika-toernooi verteenwoordig en met ‘n goue en ‘n silwer medalje teruggekeer. Haar span het ook die Afrika-toernooi gewen.
Sandra was al in 2003 as 9-jarige as die nommer 1 dogter in die 0/13 SA-pluimbalspan ingesluit. As 10-jarige het sy haar 2de SA-titel (SA 0/15-dogtersdubbespel) gewen en is sy in die 0/15 SA-pluimbalspan ingesluit.
In Maart 2007 was sy in die 0/17 SA-uitnodigingspan wat vir 2 weke in Nieu-Seeland getoer het. Sy was ook in die 0/15 Protea-pluimbalspan wat aan die O/15 Afrika-toernooi in Pretoria deelgeneem het. Sy was die Afrika-kampioen in die dogtersdubbelspel in haar ouderdomsgroep en het ook 2 brons medaljes op die toernooi verwerf.
In 2008 het sy die 0/17 SA enkel- en dubbelspeltitels in Durban gewen.
In Desember 2008 het sy Suid-Afrika in ’n O/19 pluimbaltoernooi in Mauritius verteenwoordig en in 2009 was sy in die 0/19 SA-pluimbalspan wat die Afrika-toernooi gewen het.
Benewens Sandra se prestasies in pluimbal en muurbal, het sy ook provinsiale tennis gespeel. Sy het ook tot in 2009 vir Diamantveld se 0/16A-hokkiespan gespeel.
Sy is in 2008 deur die Noord-Kaap Sportraad vereer vir haar prestasies op die pluimbalbaan en in 2009 is sy op die jaarlikse prysuitdeling as Sportpersoonlikheid vir 2008-2009 benoem. Sandra is een van slegs 4 Diamantveldleerders aan wie volle Erekleure sedert 2008 toegeken is.
5 Diamantvelders is tans ingesluit in Kovsies se Elite-Netbalgroep van 20 lede.
Hulle is:
Eersgenoemde vier is ook in die Nasionale Ligaspan, die Cheetahs, ingesluit.
Lauren-Lee Christians wat in 2009 in die SA-skolespan ingesluit is, is in Mei 2010 in die Senior SA O/19-span ingesluit.
Christine Markgraaff is weer in die Protea-span ingesluit wat later vanjaar aan die Statebondspele in Indië gaan deelneem.
Die O/19A-rugbyspan het reeds die tweede jaar in 'n ry die Sentrale Streek se @lantic 7's-toernooi gewen. Wilhelm Bester was in 2009 ingesluit in die @lantic 7's-uitnodigingspan wat in Namibië deelgeneem het.
Die nuwe Sport- en Kultuursentrum is verlede jaar in Augustus in gebruik geneem en het sy vuurdoop gehad toe die Griekwas en die Leeus in 'n Curriebeker-wedstryd op DHS se velde kragte gemeet het. Die onderskeie spanne was die eerste om die pragtige spankamers te gebruik en die konferensielokaal en die aanliggende kroeg-area is as die BBP-losie ingespan.
Die sentrum huisves die spankamers van die eerste rugbyspan, netbalspan en seuns- en meisie-hokkiespanne. Verder is daar ook die nodige kantore en stoorkamers. Dis egter die pragtige konferensiesentrum wat die oog vang en wat bekend en gewild is.
Die lokaal is geskik vir kleiner onthale soos troues, verjaarsdagpartytjies en korporatiewe geleenthede en is veral gewild vir seminare, werkswinkels en kongresse omdat behoorlik ingerig, rolstoel-vriendelik, en in 'n veilige en mooi omgewing met genoeg parkeerplek is.
Wanneer die lokaal nie verhuur word nie, benut DHS dit self vir vele aktiwiteite. Die afgelope twee jaar is die ouers van Graad 7-leerders onthaal, die koorleiers en skoolhoofde is tydens die Koorfees onthaall en die matriekouers is tydens die Matriekafskeid getrakteer. Ook het die Dramavereniging en die eerste rugbyspan in 2009 hulle jaarlikse afsluitingsfunksies in die sentrum gehou en 'n gebedsuur is saam met die bekende Jimmy Abbott en sowat 100 besoekers gehou.
Gedurende Maart 2010 is Hugenote Hoërskool vir 'n interskole-naweek ontvang en die naweek het etlike saamkuier-geleenthede in die sentrum meegebring. Tydens die DHS-sportfees is eregaste en besoekende skole se hoofde en beamptes in die sentrum onthaal en met die FNB Classic Clashes en die 75 jaar-reünie, is die sentrum ook tot sy volle kapasitiet benut.
Diamantveld is een van net 4 skole in Suid-Afrika wat deur die Duitse Pedagogiese Buitelandselandse Diens (PAD) aangewys is as “Partnerschule” (vennootskapskool).
Dit behels dat die Duits-onderrig deur die Padagogiese Diens ondersteun word in terme van leermateriaal, boeke, ‘n dataprojektor, skootrekenaar en ‘n witbord.
Die kersie op die koek is egter die aanstelling van ‘n onderwyser uit Duitsland wat deur die Padagogiese Diens besoldig word.
Mev. Susanne Baumgartner is vir twee jaar by Diamantveld aangestel om hand by te sit met die Duitsonderrig. Haar eerstehandse kennis is van onskatbare waarde vir ons ± 300 Duitsleerders.
‘n Deurslaggewende faktor by haar aanstelling was die feit dat ons Duitsleerders op nasionale sowel as internasionale vlak goed presteer. Elf uit veertien van 2009 se matrieks het met A-simbole geslaag. Vier van hulle het ook ‘n internasionaal- erkende Duitseksamen (Zertifikat Deutsch) met onderskeiding geslaag.
Celesté Groenewald (Gr.11) is op grond van haar besondere prestasie in die Nasionale Duitsolimpiade deur die PAD uitgenooi om ‘n maandlange studietoer deur Duitsland mee te maak.
Die feit dat 300 van ons leerders Duits as vak neem, was natuurlik ook ‘n deurslaggewende faktor by die PAD se besluit om DHS as ‘n vennootskapskool aan te neem.
Mev. Baumgartner is getroud met Peter (wat ook DHS se sokkerafrigter is) en hulle het twee kinders, Leo (13) en Eliza (12).