Diamantveld se tegnologie-projekte het ten doel om, in pas met wêreldwye neigings, op die voorpunt van ontwikkeling te bly. Die nuutste klaskamer-tegnologie bied oneindige moontlikhede wat aangegryp moet word. Dit gaan nie net oor toerusting nie, maar oor die totale integrasie van hardeware, sagteware, opleiding, stelsels en kommunikasie-strukture.  Dit alles help om vir leerders en onderwysers ’n beter leerervaring in ’n interaktiewe onderrig-omgewing te bied.

In 2009 is die hele skool by ‘n interne netwerk met ’n netwerkbediener en toegang tot die internet ingeskakel.   Vyf interaktiewe witborde en dataprojektors is geïnstalleer. Onderwysers en leerlinge se terugvoer en belangstelling is so gunstig dat ’n verdere tien klaskamers toegerus word.

‘n Tegnologie-koördineerder bestuur die tegnologiese proses en bring kundigheid rondom netwerke, stelsels en toepassings nader aan ons. Baie vordering is reeds met netwerk-sekuriteit en –integriteit gemaak. ’n Behoorlike rugsteunstelsel en ‘n ‘router’ is geïnstalleer om die skool teen dataverliese te vrywaar en om toegang tot die stelsel te bewerkstellig.

Ons belê in goeie fasiliteite en teen einde 2011 behoort Diamantveld ‘n ten volle geïntegreerde stelsel te hê waar alle klaskamers oor die nodige tegnologie vir interaktiewe onderrig en kommunikasie sal beskik.  ‘n Mediasentrum word ook ontwikkel.  Leerlinge wat nie andersins toegang tot sodanige tegnologie het nie, sal in die mediasentrum navorsing kan doen en sodoende kan hulle volle potensiaal verder ontwikkel word.  Alle personeel sal elektronies kan kommunikeer en die e-pos kanaal sal vir meer doeltreffende kontak met leerlinge en ouers gebruik word. 

Die evaluering en implementering van opleidingssagteware vorder ook goed en in 2011 gaan onderwysers ‘n magdom materiaal hê om met leerders te deel.  Die uiteindelike doel is dan ook om met minder bevoorregte skole te skakel sodat van ons klasse direk by hulle aangebied kan word. 

Tegnologiese uitnemendheid in die klaskamer bly ’n fokusarea. Hou gerus hierdie ruimte dop vir nuus rondom verwikkelinge.